Евреите во Македонија се згрозени од регистрaцијата на здружението со име на фашистичкиот бугарски соработник „Цар Борис Трети“

Евреите во Македонија се згрозени од регистрaцијата на здружението „Цар Борис Трети“: Дали со промоција на фашизмот се зајакнуваат добрососедските односи?! – стои во насловот од објавата во денешна Нова Македонија.

Од политичката партија Левица, уште минатата недела излегоа со соопштение во јавноста преку кое го истакнаа и актуелизираа ова како проблем на рехабилитација на фашизмот, со основање на здружение што го носи името на бугарскиот фашистички цар Борис Трети, за којшто актуелната власт на СДСМ и ДУИ не реагира, односно премолчено одобрува.

Еврејската заедница и Фондот на холокаустот на Евреите од Македонија се згрозени и навредени од регистрaцијата на здружението „Цар Борис Трети“ во Охрид и од леснотијата со која во нашата држава се глорифицираат нацизмот и фашизмот и се шири говор на омраза.

– Очигледно е дека зачестија регистрации на здруженија со бугарска самосвест што носат називи на докажани соработници на нацистичка Германија. Тоа е свесна провокација и навреда за Еврејската заедница, навреда за македонската држaва и за нејзините граѓани. Или, некој можеби мисли поинаку, дека на овој начин, со промоција и величење на фашизмот и нацизмот, се зајакнуваат добрососедските односи?! – со соопштение реагираат претседателот на Еврејската заедница Пепо Леви и претседателот на Управниот одбор на Фондот на холокаустот на Евреите од Македонија, Иван Николиќ.

Името цар Борис Трети е поврзано со прогонот и уништувањето на Евреите од окупираните територии од страна на фашистичка Бугарија за време на Втората светска војна.

– Да потсетиме, цар Борис Трети и владата на Царска Бугарија се директни виновници за депортацијата на повеќе од 11.300 Евреи од окупираните територии во Македонија, Грција и Србија, од кои 7.144 се Евреи од Македонија, во центарот за убивање Треблика, во окупирана Полска. Цар Борис Трети на 21 јануари 1941 година го потпишува антиеврејскиот Закон за заштита на нацијата, ја презема паролата на нацистичка Германија „Eден цар, еден народ, една држава“ и е докажан заговорник за спроведување на таканараченото „конечно решение на еврејското прашање“ – се вели во соопштението.

Ова е еклатантен пример на негирање и искривоколчување на холокаустот, на исмевање и навреда за Евреите, стои во реакцијата.

– На 18 април 2022 година во нашата реакција за отворањето на културниот клуб „Ванчо Михајлов“ во Битола повикавме „Да се поведе постапка околу правната издржаност културни и други центри, граѓански здруженија и сл. да носат имиња на потврдени фашисти и докажани соработници на нацистите“. Што треба да очекуваме да се случи следно? Регистрација на здруженија што го носат името на Александар Белев – комесар за еврејски прашања, Петар Габровски – министер за внатрешни работи и јавно здравје, Богдан Филов – премиер на Царска Бугарија, или можеби на Адолф Хитлер? Несфатлива е рамнодушноста на надлежните органи во прилики кога одредени поединци на најгруб начин ја искривуваат историјата и газат по достоинството на Евреите и на сите граѓани на Северна Македонија. Кои се тие лојални граѓани на Северна Македонија кои сеат омраза и глорифицираат антисемити, фашисти и нацисти основајќи вакви и слични „културни здруженија“? – се вели во реакцијата.

Тие ги прашуваат претставниците на Владата до каде е спроведувањето на двете заложби на државата преземени во Малме на Меѓународниот форум за сеќавање на холокаустот и борбата против антисемитизмот „Remember – React”, 12-14.10.2021 год., а поврзани со Заклучоците на Владата од 14 септември 2021 година:
1. проширување на наставната програма за борба против антисемитизмот и негирање на холокаустот за учениците од 8. и 9. одделение;
2. задолжителна посета на Меморијалниот центар на холокаустот за учениците од основното и од средното образование?

– Тоа е вистинскиот пат и начин како да се сузбие говорот на омраза и да се оневозможи искривување на историјата. Нашата држава може и мора да застане на патот на сè позачестените појави на регистрирање вакви здруженија, кои со своите провокации и навреди шират говор на омраза и остануваат неказнети под превезот на слобода на говорот или добрососедство. Тоа е класичен пример за искривување на историските факти и величење на фашизмот и нацизмот. Чин што не е во духот на мултикултурализмот во нашата држава и не е во духот на добрососедските односи меѓу Северна Македонија и Бугарија – се вели во реакцијата.

*Статијата е делумно преземена од Нова Македонија