Нова набавка со спорни цени во локалната самоуправа го тресе Скопје – овојпат фокусот е врз Општина Аеродром, која потрошила речиси 3 милиони денари (околу 49.000 евра) за механизација за одржување на јавни зелени површини, со суми кои значително ја надминуваат реалната пазарна вредност на опремата.
Според достапните податоци, набавени се:
- две машини по 473.000 денари за одржување зелени површини,
- две тракторски косилки со предно косење и мулчер по 499.000 денари,
- пет моторни косилки за трева по 42.690 денари,
- пет тримери за косење по 36.400 денари,
- и пет грбни дувалки за лисја по 40.330 денари.
Проблемот е што сета оваа опрема е платена значително повеќе од нејзината реална пазарна цена. На интернет, слична механизација може да се најде за многу пониски цени – тракторските косилки, на пример, се достапни и за двојно пониска цена од таа што ја платила општината. Истото важи и за тримерите, дувалките и другата опрема.
Дополнителен сомнеж буди фактот што на јавната набавка учествувал само еден понудувач – компанијата која го доби тендерот. Ова отвора прашања за транспарентноста на постапката и можните договорени услови во позадина.
Тука станува збор за класичен пример на расипничко трошење на јавни средства и Државната комисија за спречување на корупција и Државниот завод за ревизија итно мораат да ја испитаат оваа сомнителна набавка.
Случајот отвора сериозни прашања за начинот на кој се спроведуваат тендерите на локално ниво и дали јавниот интерес е навистина заштитен. Од Општина Аеродром засега нема официјална изјава по ова прашање.
Извор: Инфомакс
