Вучиќ ќе патува на парадата во Москва за 9ти мај и покрај заканите од ЕУ

Српскиот претседател Александар Вучиќ најави дека ќе отпатува во Москва на 9 мај за да присуствува на прославата на Денот на победата, организирана од рускиот претседател Владимир Путин, и покрај силниот притисок и јасните предупредувања од Европската Унија.

Според американската новинска агенција Асошиетед прес, ЕУ веќе изразила сериозна загриженост дека присуството на српскиот претседател на настанот би било спротивно на европските вредности и политиките, особено во контекст на руската агресија врз Украина. Европските претставници истакнаа дека учеството на ваква церемонија може да се толкува како индиректна поддршка на Москва и да ги наруши аспирациите на Србија за членство во Унијата.

„Ова ќе биде првпат Србија заеднички да учествува во организацијата на парадата во Москва“, изјавил Вучиќ, најавувајќи дека ќе биде придружуван од словачкиот премиер Роберт Фицо, како и од лидерот на босанските Срби, Милорад Додик.

Европската комесарка за надворешни работи, Каја Калас, претходно изјави дека ЕУ „јасно стави до знаење дека не сака ниту една земја-кандидат за членство да учествува на настаните во Москва“.

На истата прес-конференција каде ја најави својата посета на Русија, Вучиќ се осврна и на контроверзниот извештај на руската разузнавачка служба ФСБ, според кој српските власти не користеле звучно оружје против демонстрантите за време на протестите во Белград во март. „ФСБ категорично утврди дека немало никаква употреба на звучно оружје“, рече Вучиќ, но не понуди дополнителни детали за тоа како руската служба дошла до тој заклучок.

Посетата на Москва доаѓа во чувствителен момент за српската надворешна политика, која се наоѓа меѓу тежнењето кон членство во ЕУ и одржувањето на блиски односи со Русија. Настанот на 9 мај би можел дополнително да ги продлабочи тензиите меѓу Белград и Брисел.