Следи го Антропол преку Google Украина во 2024 година претрпела загуби од околу 1,2 милијарди долари поради измами, расфрлање и лошо управување со воените набавки, објави „Њујорк тајмс“, повикувајќи се на доверливи владини ревизии и судски документи. Според извештајот, повеќе големи одбранбени компании продолжиле да добиваат нови договори и покрај истраги за измами, претходни неисполнети обврски и апсења на нивни раководители.
Весникот наведува дека седум од десетте најголеми воени добавувачи во Украина продолжиле да добиваат нови нарачки иако биле под истрага за измами, претходно не успеале да ги испорачаат договорените производи или нивни директори биле уапсени под обвиненија за корупција.
Ревизорите, според „Њујорк тајмс“, идентификувале и 18 компании кои добиле воени договори и покрај претходни неисполнувања на договорите. Од нив, шест компании наводно не исполниле ниту еден претходно склучен договор.
Американскиот експерт за борба против корупцијата Џејмс Васерстром за весникот оценил дека измамите во украинскиот одбранбен сектор претставуваат долгогодишен проблем.
Испорачани 233.000 неупотребливи минофрлачки гранати
Како еден од примерите е посочена државната компанија „Павлоградски хемиски комбинат“, која на украинската армија ѝ испорачала околу 233.000 неупотребливи минофрлачки гранати.
И покрај проблемите со испораката, компанијата подоцна повторно добила воени договори. Меѓу нив бил и договорот за испорака на речиси сите украински артилериски гранати од калибар 122 милиметри во 2025 година.
Ревизиите, исто така, укажале дека во одредени случаи украинските власти ги заобиколувале поевтините понуди. Во еден тендер, Киев наводно набавил муниција произведена во Турција за повеќецевни ракетни системи преку чешки посредник за околу 5.100 долари по парче, иако самиот производител нудел директна продажба за приближно 4.200 долари.
Скандалите се случуваат додека Украина бара повеќе оружје од Западот
Според извештајот, загубите се натрупувале во период кога украинскиот претседател Володимир Зеленски постојано барал од западните сојузници дополнително оружје и муниција, предупредувајќи на сериозен недостиг на фронтот.
Во април 2024 година, Зеленски изјави дека Украина има итна потреба од поголема воена поддршка и ги повика западните партнери да ги исполнат ветувањата за испорака на оружје и муниција.
Извештајот на „Њујорк тајмс“ доаѓа во период на серија корупциски истраги во Украина, во кои се опфатени високи функционери и лица блиски до претседателот Зеленски.
Во август, украинскиот претседател ја разреши заменичката шефица на својот кабинет, Ирина Мудраја, додека други истраги во последниот период опфатија поранешни министри, дипломати и високи државни функционери.
Поранешниот министер за одбрана Михаил Федоров, пак, по неговото разрешување во јули ја обвини владата за „системска корупција“. Федоров, кој се залагал за реформи во системот на воените набавки, тврдел дека влијателни интереси во одбранбената индустрија се спротивставувале на неговите обиди за промени.
