Следи го Антропол преку Google Аргентинскиот претседател Хавиер Милеи најави економски санкции против компании кои планираат експлоатација на нафта во близина на Фолкландските Острови, повторно заострувајќи го долгогодишниот спор со Велика Британија. Во обраќање до нацијата, Милеи порача дека Аргентина има историско и правно право на островите и најави законски измени со кои би се спречиле енергетските проекти во спорната област.
Милеи го претстави планот во претседателската палата, опкружен со членови на владата, при што повторно го употреби аргентинскиот назив Малвини за островите.
Клучниот дел од неговото обраќање се однесуваше на предлог-закон што ќе биде доставен до аргентинскиот парламент. Со него се предвидуваат санкции за енергетски компании кои ќе учествуваат во истражување и експлоатација на нафта во близина на островите.
Особено внимание привлече нафтеното поле „Си Лајон“ (Sea Lion), кое се наоѓа на околу 210 километри од Фолкландските Острови. Според проценките наведени во извештајот, подрачјето може да содржи околу 1,7 милијарди барели нафта.
Британската компанија „Рокхопер експлорејшн“ и израелската „Навитас петролеум“ планираат да започнат со експлоатација во наредните две години.
Милеи го опиша проектот како „јасна и непосредна опасност“ и предупреди дека без брза реакција компаниите би можеле да стекнат техничка способност за пристап до нафтените резерви.
Од „Рокхопер“ претходно го опишаа нафтеното поле како потенцијален извор на сурова нафта за која постои голема побарувачка.
„Навитас“, пак, објави снимки од активностите на островите, каде што, според компанијата, се работи на инфраструктура која вклучува пристанишен терминал, хелиодром и објекти за сместување на работници.
Британската влада, според Би-би-си, повторно ја потврди својата позиција дека жителите на Фолкландските Острови се британски државјани кои имаат право сами да одлучуваат за својата иднина.
На референдумот од 2013 година, дури 99,8 отсто од гласачите се изјасниле за останување под британска власт, додека само тројца гласале против.
Сè уште нема детални информации како би изгледале најавените аргентински санкции и во колкава мера би можеле да влијаат врз компаниите вклучени во нафтените проекти. Аргентина и претходно имала механизми со кои можела да ограничи активности на компании во проекти што ги смета за неовластени.
Аргентинскиот претседател најави и изградба на поморска база во Огнена Земја, на крајниот југ на земјата.
Милеи истовремено изрази оптимизам дека ставот на САД кон спорот би можел да се промени, повикувајќи се на неодамнешни изјави на американскиот претседател Доналд Трамп.
Трамп, запрашан дали САД би ја поддржале Британија во евентуален нов конфликт околу островите, изјавил дека Британија „не била таму за да му помогне“ во конфликтот со Иран. Претходно, тој остави отворена можност Вашингтон да ја преиспита досегашната неутрална позиција во спорот доколку Лондон не ги зголеми издвојувањата за одбрана.
Милеи оцени дека Аргентина може да биде „сигурен партнер и вреден сојузник“ за САД во иднина, додека Велика Британија ја опиша како земја „во опаѓање“.
Прашањето за суверенитетот над Фолкландските Острови останува нерешено повеќе од 40 години по војната меѓу Аргентина и Велика Британија.
Во 1982 година, аргентинските сили се истоварија на островите со цел да го потврдат аргентинското право врз територијата. Следуваше 74-дневен конфликт, кој заврши со победа на британските сили.
Во војната загинаа 255 британски војници, 649 аргентински војници и тројца жители на островите.
И покрај тоа што денес нема вооружен конфликт, спорот редовно повторно се појавува во политичкиот и јавниот дискурс во двете земји. Најновите најави на Милеи, особено околу санкциите за нафтените компании и изградбата на поморска инфраструктура, повторно го ставаат прашањето за Фолкландите во центарот на вниманието.
