Само неколку дена откако Доналд Трамп триумфално го најави „историскиот договор“ за разоружување на Хамас, израелските напади врз Газа не само што не престанаа, туку дополнително се засилија. Јули беше најсмртоносниот месец во Газа оваа година, со 152 убиени луѓе, а од почетокот на таканареченото примирје во октомври 2025 година, вкупниот број на жртви достигна 1.250 убиени и над 4.100 ранети. Ова покажува колку вреди зборот „примирје“ кога едната страна има целосна воена и политичка поддршка од една од најмоќните сили на светот.
Само во изминатите неколку дена, израелски удари убија најмалку седум лица, вклучувајќи го и уништувањето на магацин со медицински материјали веднаш до болница која служи како единствена животна линија за илјадници раселени семејства. Во нападите загинаа и цели семејства – меѓу нив Абдулах Абу Таиф, неговата бремена сопруга Абир Анан и нивното петгодишно дете.
Додека сето ова се случува на терен, во Израел политичката елита се расправа околу тоа дали воопшто треба да се повлече од Газа, а самите услови на договорот, кои предвидуваат постепено пренесување власт кон палестинска администрација, наидуваат на отворено непријателство кај израелските политичари. Ова е суштината на целата фарса – меѓународната заедница и медиумите слават „пробив“ и „историски договор“, додека реалноста на терен покажува продолжување на систематското уништување на еден народ, поткрепено од геополитички интереси на империјалистичките сили кои профитираат од нестабилноста во регионот, а не од вистинска правда за Палестинците.
