Иран во наредните недели се очекува да ја прими првата испорака од вкупно до 400 кинески рачни противвоздушни ракетни системи (МАНПАДС), во рамки на договор вреден меѓу 60 и 70 милиони долари, објави Ројтерс.
Според информациите, договорот предвидува набавка на меѓу 300 и 400 преносливи противвоздушни ракетни системи, меѓу кои и кинеските модели ЌВ-12 и ФН-16. Станува збор за инфрацрвено наведувани ракети земја-воздух, наменети за соборување нисколетечки авиони, хеликоптери и беспилотни летала. Поради нивната мобилност, тие можат брзо да бидат распоредени околу воени бази, енергетски капацитети и друга стратешка инфраструктура.
Оваа набавка претставува еден од најголемите познати обиди на Техеран да ја засили својата противвоздушна одбрана со краток домет од почетокот на воениот судир со Соединетите Американски Држави и Израел.
Потребата од повторно вооружување доаѓа по повеќемесечните напади врз ирански објекти поврзани со развојот на ракети, беспилотни летала и противвоздушна одбрана, извршени од САД и Израел. Иран, пак, возврати со балистички ракети и беспилотни летала.
Судирот, според оценките, ја покажал ранливоста на постојаните воени и стратешки објекти на напредни борбени авиони и прецизно наведувано оружје.
Во меѓувреме, Вашингтон во саботата ја прекина двонеделната бомбардерска кампања, но американскиот претседател Доналд Трамп предупреди дека нападите би можеле да продолжат доколку преговорите не доведат до крај на петмесечниот конфликт, кој формално се наоѓа во состојба на примирје од април.
Испораката на стотици МАНПАДС системи значително би ги зголемила капацитетите на Иран за противвоздушна одбрана со краток домет, а воедно би претставувала и дополнителен показател за продлабочувањето на воената соработка меѓу Кина и Иран.
