Американскиот секретар за „војна“ Пит Хегсет се најде на удар на демократските сенатори за време на сослушувањето во Сенатот, каде што ја бранеше американската воена кампања против Иран, додека администрацијата на претседателот Доналд Трамп побара дополнителни 87 милијарди долари за финансирање на операциите на Пентагон.
Хегсет пред Комитетот за буџетски средства изјави дека воената кампања против Иран, која САД ја започнаа заедно со Израел на 28 февруари, досега чинела околу 37,5 милијарди долари.
Од побараните 87 милијарди долари, 67 милијарди се наменети за операции на Блискиот Исток. Според Хегсет, без овие средства Пентагон би се соочил со сериозни финансиски недостатоци што би влијаеле врз исплатата на војниците, обновувањето на воената опрема и продолжувањето на операциите.
За време на расправата, демократските сенатори го обвинија Хегсет дека администрацијата не ги постигнала целите поставени за војната и дека јавноста била доведена во заблуда.
Сенаторката Кирстен Гилибранд потсети дека минатата недела во ирански напад врз американска база во Јордан загинале двајца американски војници, и покрај претходните тврдења на Хегсет дека иранските ракетни капацитети биле „исцрпени и уништени“.
Како одговор, министерот изјави дека никогаш не било кажано дека Иран целосно ја изгубил способноста да лансира ракети, но оцени дека иранската воена индустрија е сериозно ослабена и дека Техеран не може рамноправно да се спротивстави на САД.
И сенаторот Џон Ософ го праша дали заканата од иранските ракети навистина била неутрализирана, на што Хегсет повтори дека никој не очекувал Иран целосно да остане без ракетни капацитети.
Сослушувањето неколкупати беше прекинувано од демонстранти кои протестираа против американските напади врз Иран и израелската воена операција во Газа.
И покрај критиките, Хегсет ја оцени воената кампања како успешна, тврдејќи дека Иран е „целосно надмоќно поразен“ од почетокот на конфликтот и дека администрацијата на Трамп нема да дозволи САД да бидат вовлечени во, како што рече, „глупави војни“.
