Секторот за внатрешни работи Куманово поднесе кривични пријави против три девојки, од кои две се малолетнички, поради сомнение дека извршиле кривично дело „насилство“ врз 14-годишно девојче. Според полицијата, осомничените најпрвин ја навредувале и понижувале жртвата, а потоа физички ја нападнале, додека една од нив го снимала целиот инцидент со мобилен телефон.
Кривичната пријава е поднесена против 18-годишната П.А. од селото Лојане, општина Липково, како и против две малолетнички на возраст од 14 и 15 години од Куманово. Тие се товарат за кривично дело „насилство“, казниво по член 386 став 3 од Кривичниот законик.
Според информациите од СВР Куманово, настанот се случил на 13 март 2026 година околу 18 часот. Осомничените ја повикале малолетничката да излезе од нејзиниот дом, а потоа ја убедиле да влезе во просторија во близина на спортскиот центар „Соколана“ во Куманово.
Откако влегла во просторијата, девојчето најпрвин било изложено на навреди и понижување, по што трите осомничени физички ја нападнале. За време на нападот, една од нив со мобилен телефон го снимала целиот настан.
По нападот, осомничените ѝ упатиле сериозни закани на малолетничката, барајќи од неа да не го пријавува случајот во полиција и никому да не зборува за снимката. Притоа ѝ се заканиле дека, доколку го стори тоа или ако видеото стане јавно достапно, ќе се соочи со уште потешки последици.
По преземените истражни дејствија и обезбедените докази, СВР Куманово го расчисти случајот и до надлежното јавно обвинителство поднесе кривична пријава против трите осомничени.
