Советничката група на Левица во Општина Кисела Вода соопшти дека поднела иницијатива за спроведување вонреден инспекциски надзор во градинката „Весели Цветови“ – објект „Мимоза“, по неодамнешните поплави што го зафатија објектот.
Од Левица информираат дека од надлежните институции бараат итно да утврдат дали биле исполнети сите законски услови за безбедно користење на градинката и дали со постапувањето на раководството биле целосно заштитени здравјето и безбедноста на децата.
Според соопштението, иницијативата е доставена до Државен санитарен и здравствен инспекторат, Инспекторат за заштита на децата и Агенција за храна и ветеринарство.
Од советничката група очекуваат институциите без одлагање да ја утврдат фактичката состојба, да ја испитаат законитоста на постапувањето и да преземат соодветни мерки доколку се констатираат пропусти.
„Здравјето и безбедноста на децата не смеат да бидат предмет на импровизации, ниту на проценки без официјално утврдена безбедност. Институциите имаат обврска да постапат брзо, транспарентно и во интерес на најмладите“, се наведува во соопштението на Левица.
