Следи го Антропол преку Google Круме Богевски, преку објава на социјалните мрежи, информираше дека учествувал на средба на млади лидери од Централна и Источна Европа и Кина, која се одржала во Вухан по покана на Комунистичката партија на Кина.
Во своето обраќање на пленарната сесија, Богевски истакнал дека младите треба да бидат двигатели на општествените промени, а не само набљудувачи на процесите. Тој посочил дека е неопходна борба против корупцијата на локално ниво, поголема поддршка за универзитетите и напуштање на пристапот во кој јавните добра се третираат исклучиво како предмет на пазарни трансакции.
„Младите мора да бидат иноватори, а не набљудувачи. Мора да се бориме против корупцијата во општините, недоволното финансирање на универзитетите и идеологијата што секое јавно добро го сведува на трансакција“, порача Богевски.
Тој нагласил дека искуствата од кинеската модернизација и социјалистичкото управување можат да послужат како пример за изградба на поефикасни институции, во кои солидарноста ќе биде поважна од клиентелизмот. Според него, ваквите практики треба да се применат и во локалното управување во Македонија.
„Се враќам во Кавадарци не само за да побарам системска одговорност, туку и активно да ги пренесам стратешките лекции од кинеската модернизација директно во нашето локално управување“, истакнал тој.
Богевски се заложил за долгорочно планирање на јавната инфраструктура, наведувајќи примери како општински соларни кооперативи и современи јавни здравствени установи. Воедно, ги повикал младите од другите градови и институции да ги применуваат стратегиите за развој и мобилизација на ресурсите со цел создавање конкретни јавни добра во интерес на граѓаните.
„Нашата соработка не треба да се мери со меморандуми, туку со резултати што работниот народ може да ги почувствува“, порача Богевски.
