Пратеникот на Левица, Реџеп Исмаил, на вчерашната собраниска расправа за интерпелацијата на министерот за земјоделство, Цветан Трипуновски, оцени дека македонското земјоделство се соочува со сериозен пад на производството и бројот на земјоделци, и покрај тоа што државата со години издвојува значителни средства за субвенции и поддршка на секторот.
Во своето излагање, Исмаил го постави прашањето за ефикасноста на досегашните политики во земјоделството и побара одговорност за, како што рече, сè полошите резултати во една од најважните стопански гранки во државата.
„Основното прашање коешто се поставува и сите го поставуваат е како е можно државата сите овие години да троши толку огромни ресурси, стотици милиони евра, а да бележи пад на основните производни показатели?“, праша Исмаил.
Според него, и покрај големите финансиски вложувања во земјоделството, бројките покажуваат континуирано намалување на производството и сточниот фонд.
„Како е можно државата да инвестира толку многу пари во земјоделието, во субвенционирањето, а сепак на крај да имаме помалку овци, помалку производство на млеко, помалку производство на ориз, помалку земјоделски производи, помалку рибарство и сè полоша состојба на шумите?“, истакна пратеникот.
Тој упати критики и кон организацијата на Министерството за земјоделство, шумарство и водостопанство, оценувајќи дека институцијата е преоптоварена со административен кадар и раководни позиции, додека контролата на терен е недоволна.
„Ако ја видите систематизацијата на Министерството, ќе приметите дека ова Министерство веројатно ја имитира структурата на Обединетите нации. Тука има толку сектори, толку раководни позиции, толку многу луѓе. Имате дури тринаесет државни советници“, рече Исмаил.
Според него, и покрај обемната администрација, институциите не успеваат ефикасно да ги контролираат корисниците на субвенции и да утврдат дали средствата завршуваат кај вистинските производители.
„На терен не можете да спроведете дали некој навистина зема субвенции од тоа што има костен или цреши, или нема насадено ништо. Има многу такви случаи. Еве зошто не можете – затоа што сте преполни со администрација“, нагласи пратеникот на Левица.
Исмаил оцени дека наместо да се вложува во реална поддршка на производството и контрола на системот, државата создава сè поголем административен апарат, додека земјоделските показатели продолжуваат да се влошуваат.
Неговото обраќање беше дел од расправата по интерпелацијата на министерот Цветан Трипуновски, иницирана поради состојбите во земјоделскиот сектор и работењето на Министерството за земјоделство, шумарство и водостопанство.
