Советничката Милица Давчева од Левица на седницата за советнички прашања во Советот на Град Скопје, нагласи дека додека Ѓорѓиевски одолговлекува, тактизира и се премислува околу дивиот пешачки премин на Бит-пазар, граѓаните ја плаќаат цената на неговата неодлучност. Како доказ за тоа, таа ја посочи сообраќајната незгода од минатата недела, кога двајца пешаци беа повредени токму на овој проблематичен и небезбеден пешачки премин.
Вие пред некое време во медиумите излеговте со дециден став дека пешачкиот премин ќе биде затворен, но откако наидовте на отпор кај граѓаните, после неколку дена вие веднаш го сменивте вашиот став и рековте дека доколку граѓаните мислат и сметаат дека таму треба се направи пешачки премин, вие ќе направите пешачки премин, односно доживеавте целосно политичко ретерирање- рече советничката.
Ова не е некое споредно сокаче во градот туку е главна артерија која го поврзува Центарот со целиот северен дел од градот, тука се општините Чаир, Бутел, Шуто Оризари и Чучер Сандево. Таму секојдневно претрчуваат деца и ученици до блиското основно училиште, студенти, стари лица и лица кои одат во поликлиниката Бит-пазар. Па затоа прашувам дали нам треба да ни се случуваат трагедии со фатален исход па дури потоа да се освестите дека треба нешто да се преземе – праша Давчева.
Додека вие тактизирате, калкулирате, се премислувате, ставови од денес за утре, реалноста ве демантира на најсуров можен начин, а доказ за тоа е инцидентот кој се случи минатиот четврток кога на истото место беа прегазени маж и жена кои за среќа немаа фатални последици- порача Давчева.
