Политичката партија Левица ја обвини Владата предводена од премиерот Христијан Мицкоски дека се откажала од ветувањата дадени додека беше во опозиција во однос на договорот со „Бехтел и Енка“, и наместо негово репреговарање обезбедува нови задолжувања за финансирање на истиот проект.
Од Левица потсетуваат дека ВМРО-ДПМНЕ во опозицискиот период договорот го претставувала како пример за криминал, нетранспарентност и штетно трошење на јавните средства, најавувајќи дека ќе бара одговорност и ќе ги преиспита неговите услови.
„Денес наместо репреговарање, како што ветуваше Мицкоски во опозиција, неговата Влада сега обезбедува нови средства и нови задолжувања за истиот проект. Ако договорот бил криминален тогаш, зошто денес се финансира? Ако бил штетен за државата, зошто не е изменет?“, прашуваат од партијата.
Во реакцијата се оценува дека со децении државата не успева да воспостави систем за реализација на капитални проекти без дополнителни трошоци, анекси и нови задолжувања, при што товарот, според Левица, постојано се префрла врз граѓаните.
„Наместо функционална инфраструктура, генерациите се задолжуваат со нови долгови. Статус квото продолжува, а со тоа продолжува и изолацијата на државата“, наведуваат од партијата.
Левица смета дека додека соседните земји работат на привлекување инвестиции и развој на инфраструктурата, Македонија останува заробена во, како што велат, „кругот на политички пресметки, нереализирани ветувања и континуирано задолжување“.
„Наместо Македонија да стане регионален центар за инвестиции, транспорт и бизнис, таа сè повеќе ризикува да стане спореден и ирелевантен фактор на Балканот. Цената на тоа не ја плаќаат партиите на естаблишментот, туку граѓаните, компаниите и идните генерации кои ќе ги враќаат долговите создадени денес“, порачуваат од Левица.
