Советникот од Левица во Советот на Општина Тетово, Боби Илиевски, реагира на одлуката на Советот на Општина Тетово да одобри префрлање на 1.144.484 денари од општинскиот буџет за покривање на даночни обврски на Арабати Баба Теќе, оценувајќи дека станува збор за неодговорно трошење на јавни средства во услови на сериозни проблеми со кои се соочуваат граѓаните.
Од партијата посочуваат дека додека жителите на Тетово се соочуваат со проблеми поврзани со комуналната хигиена, оштетена инфраструктура и недоволно квалитетни јавни услуги, локалната власт одлучила да издвојува средства за покривање на обврски на верски објект.
„Без срам е изгласана одлука за префрлање на 1.144.484 денари од буџетот на општината за покривање на данокот на ИВЗ за Арабати Баба Теќе“, наведуваат од Левица, додавајќи дека општината во моментов има блокирана сметка и значителен јавен долг.
Советникот на Левица во Советот на Општина Тетово, Боби Илиевски, ја критикуваше одлуката и порача дека доколку носителите на власта сметаат дека е потребна ваква помош, треба да ја обезбедат од сопствени средства.
„Ако сте толку големи верници и хуманисти, донирајте по една плата и паушал од сопствен џеб, а не од маката на граѓаните“, изјави Илиевски.
Од Левица прашуваат врз основа на кои критериуми се носат вакви одлуки и дали ист третман би добиле и други верски заедници или граѓани кои се соочуваат со финансиски тешкотии.
Според партијата, буџетот на општината го полнат сите граѓани, без разлика на нивната верска или етничка припадност, поради што јавните средства треба да се користат за решавање на приоритетните потреби на локалната заедница.
„Ова не е грижа за културното наследство. Ова е купување политички мир и политички поени со пари на граѓаните“, наведува советникот од Левица.
Оттаму повикуваат на поголема транспарентност и отчетност при трошењето на општинските средства, оценувајќи дека јавниот интерес мора да има предност пред партиските и политичките интереси.
