Патувањето во Минск долго време било желба на авторката на репортажата, која оваа пролет конечно добила можност да го посети главниот град на Белорусија и одблиску да се запознае со секојдневниот живот во земја која со години се наоѓа под западни санкции.
- Автор на репортажата – Соња Стојадиновиќ
До Минск пристигнала преку литванскиот град Вилнус, од каде со автобус патувала до белоруската престолнина. Иако растојанието меѓу двата града е околу 200 километри, патувањето траело значително подолго поради граничните контроли.
Првиот впечаток од Минск бил град со модерна инфраструктура, чисти улици и голем број нови автомобили, особено кинески електрични возила од марки како Geely, BYD, Zeekr, Xiaomi и Voyah. Покрај нив, на улиците често можат да се видат и нови модели на Mercedes, BMW и Porsche.
За време на посетата, градот бил украсен по повод 9 Мај – Денот на победата над фашизмот. Низ улиците биле истакнати белоруски знамиња и Георгиевски ленти, а на централниот плоштад бил организиран концерт и изложба на воена техника. Авторката забележува дека сеќавањето на жртвите од Втората светска војна и понатаму има силно место во белоруското општество.
Според нејзините впечатоци, Минск е модерен и зелен град со широки булевари, паркови и големи слободни простори меѓу зградите – карактеристика наследена од советскиот урбанистички модел. Во новите населби се води сметка за присуство на градинки, училишта, здравствени установи и зелени површини.
Животните трошоци, според репортажата, остануваат релативно пристапни. Стан од околу 70 квадратни метри во периферните делови на градот може да се изнајми за околу 300 евра месечно, додека јавниот превоз е добро развиен и евтин. Покрај метрото и автобусите, популарни се и таканаречените „маршрутки“ – минибуси кои ги поврзуваат различните делови на градот.
Авторката посочува дека и покрај санкциите, продавниците се добро снабдени. Белорусија значително го зголемила домашното производство на храна и успешно ги заменила многу увозни производи со локални алтернативи. Посебно ги издвојува квалитетот на млечните производи, месните специјалитети и домашното пиво.
Во текстот се наведува дека државата го задржала советскиот систем на стандарди за производство, познат како ГОСТ, што според авторката придонесува за висок квалитет на производите.
Покрај локалните производи, на пазарот се присутни и многу глобални брендови, а цените на мобилните телефони и електрониката се споредливи со оние во останатиот дел од Европа. Забележлива е и силната економска соработка со Кина, која инвестира во инфраструктурата, индустријата и технолошките паркови во Белорусија.
Репортажата наведува дека главни двигатели на белоруската економија се земјоделството, производството на храна, машинската индустрија, ИТ-секторот и извозот. Белорусија во 2024 година остварила извоз од речиси 40 милијарди долари, при што најголеми трговски партнери се Русија, Кина и земјите од Евроазиската економска унија.
На политички план, авторката не навлегува подлабоко во анализи, но забележува дека голем дел од луѓето со кои разговарала изразувале задоволство од својот животен стандард и доверба во претседателот Александар Лукашенко.
„Недела дена не беа доволни за целосно да се запознае Минск, но она што го видов ме изненади и воодушеви“, заклучува авторката, додавајќи дека своите впечатоци ги темели исклучиво на искуството од белоруската престолнина.
Текстот е преземен делумно и преведен од ЛУПИГА
