Инженерот Дејан Димовски, преку објава на социјалните мрежи направи споредба меѓу финансиската состојба на државните и приватните компании во енергетскиот сектор, посочувајќи дека државните претпријатија се соочуваат со високи долгови, додека приватните компании бележат огромни добивки.
Според Димовски, АД ЕСМ заклучно со 2025 година има обврски во висина од речиси 120 милиони евра, додека компанијата ЕСМ Дистрибуција на топлинска енергија должи над 29 милиони евра.
„АД ЕСМ должи 119.746.618 евра, а ЕСМ Дистрибуција на топлинска енергија должи 29.185.906 евра“, наведува Димовски, повикувајќи се на податоци од Министерството за финансии за доспеани и недоспеани фактури.
Тој посочува и дека државата продолжува да плаќа значителни средства за гасниот интерконектор во Александрополис.
„Државата исплаќа месечни фактури од 300.000 евра за непостоечки гасен интерконектор во Александрополис“, пишува Димовски.
Во објавата се наведуваат и податоци за профитите на приватните енергетски компании. Според него, компаниите од групацијата ЕВН во Македонија во 2025 година оствариле вкупна добивка од околу 45 милиони евра.
„Електродистрибуција ДООЕЛ Скопје има добивка од 21 милион евра, ЕВН Македонија АД над 11,5 милиони евра, а ЕВН Македонија Електрани повеќе од 11,2 милиони евра. Вкупно групацијата ЕВН во Македонија има приближно 45 милиони евра добивка за 2025 година“, наведува тој.
Димовски потсетува и дека ЕВН Македонија била продадена во 2006 година за 225 милиони евра, нагласувајќи дека матичната компанија во Австрија е со доминантен државен капитал.
Осврнувајќи се и на други компании од секторот, тој наведува дека ТЕ-ТО Скопје остварила добивка од над 10,5 милиони евра, додека ОКТА Скопје прикажала добивка од над 9,3 милиони евра.
„Бројкиве се одраз на 35 години енергетика во Македонија“, оценува Димовски.
Тој воедно изразува надеж дека академската заедница ќе направи подетална анализа на состојбите во енергетскиот сектор.
„Се надевам професорите од ФЕИТ и од Економскиот факултет при УКИМ ќе се мотивираат да направат студија согласно со бројкиве, како што направија студија за 20 години ЕВН во Македонија“, наведува Димовски.
