Членот на Президиумот на Левица, Александар Симонов, преку објава на социјалните мрежи упати жестоки критики кон Владата, обвинувајќи ја дека економските и трудовите политики ги креира според интересите на работодавачите, а не според потребите на работниците. Според него, одбивањето на зголемување на минималната плата, зголемувањето на квотите за странски работници и најавите за ограничување на боледувањата се дел од поширок модел на политики што одат во корист на бизнис-заедницата.
Во својата објава, Симонов посочува дека додека илјадници работници протестираат и бараат повисока минимална плата, Владата останува на ставот дека нема услови за нејзино зголемување.
„Овој господин вели ‘нема зголемување на минималната плата’, илјадници работници на протести, Владата застанува зад овој господин, и не им гајле за барањата на работниците“, наведува Симонов за претседателот на Стопанската комора, Бранко Азески.
Тој ја критикува и владината одлука за зголемување на квотите за вработување странски работници, оценувајќи дека и покрај реакциите во јавноста, институциите ги следат барањата на бизнис-секторот.
„Овој господин вели ‘зголемете квоти за вработување на странски работници’, народот негодува, а Владата носи одлука за зголемување на квотите на странски работници“, пишува Симонов, за антиработничките изјави на претседателот на Стопанската комора Бранко Азески.
Во објавата се осврнува и на наводните иницијативи за ограничување на боледувањата, тврдејќи дека тие се насочени кон дополнително намалување на работничките права.
„Овој господин вели ‘работниците злоупотребуваат боледувања’, а Владата подготвува правилник за кратење на максималниот број денови боледување што може да ги издаде матичен доктор“, посочува тој, критикувајќи ги изјавите на претседателот на Стопанската комора Бранко Азески.
Симонов смета дека Владата не покажува подготвеност за даночни реформи кои би вовеле поголема правичност во системот.
„Нема прогресивен данок, исто ќе плаќаме и газдите и работниците“, наведува тој, додавајќи дека властите избегнуваат мерки што би ги засегнале најбогатите слоеви.
На крајот, Симонов ја коментира и најновата иницијатива за можноста од намалување на бројот на неработни денови, оценувајќи дека и таа произлегува од барањата на бизнис-заедницата.
„Во демоНкратијава наша не владее и не носи одлуки мнозинството, туку мала група на луѓе што секогаш е на власт, без разлика дали оние или овие ја формирале Владата“, порачува Симонов.
