Продолжувањето на А-интегрираната еколошка дозвола за цементарницата ТИТАН Усје предизвика остри реакции од Левица, од каде обвинуваат дека институциите покажуваат толеранција кон корпорацијата, додека граѓаните и стручната јавност се соочуваат со кратки рокови и ограничен пристап до информациите.
Од партијата велат дека јавноста има само 30 дена да ја анализира обемната документација која ќе влијае врз квалитетот на воздухот и здравјето на граѓаните во наредните седум години, додека на компанијата ѝ биле оставени повеќе од два месеци за дополнувања и корекции.
„Стручната јавност, лекарите, екологистите и сите засегнати страни добиваат само 30 дена да анализираат обемна документација која ќе одлучува за квалитетот на воздухот и здравјето на населението во следните седум години. Од друга страна, на Усје ѝ беа оставени повеќе од два месеци за корекции, дополнувања и усогласување на документацијата“, наведуваат од Левица.
Партијата смета дека процесот не е доволно транспарентен и дека документацијата е објавена на начин што ја прави тешко достапна за пошироката јавност.
„Наместо процесот да биде јавно истакнат и достапен за секој граѓанин, тој е скриен во административни папки и бирократски процедури кои очигледно повеќе му служат на инвеститорот отколку на јавниот интерес“, се вели во реакцијата.
Од Левица поставуваат прашање зошто институциите не спроведуваат поширока информативна кампања за постапката и зошто граѓаните сами треба да ја бараат документацијата за проект кој директно влијае врз нивното здравје.
Дополнителна загриженост, според партијата, предизвикува можноста јавната расправа да се одржи веднаш по 26 јуни, во период кога започнуваат летните одмори.
„Граѓаните со право се прашуваат дали станува збор за случајност или за внимателно избран термин во кој критиките ќе бидат помалку бројни, а отпорот послаб“, наведуваат од Левица.
Партијата потсетува дека цементарницата со години остварува милионски профити, додека жителите на Скопје се соочуваат со последиците од загадениот воздух.
„Денес се одлучува дали во наредните седум години компанијата ќе продолжи да работи под услови што ќе ги штитат интересите на јавноста или под услови што ќе го штитат нејзиниот профит“, стои во реакцијата.
Левица бара продолжување на рокот за доставување јавни забелешки, одржување на јавната расправа во термин што ќе овозможи масовно учество, независна експертска ревизија на документацијата, задолжителен независен мониторинг на емисиите со јавно достапни податоци во реално време, како и воведување построги еколошки стандарди.
„Воздухот не е сопственост на ТИТАН Усје. Институциите не смеат да работат во интерес на загадувачите, туку во интерес на народот. Оваа битка не е само за една дозвола, туку за тоа кој одлучува за иднината на Скопје – народот или корпорациите“, порачуваат од Левица.
