Политичката партија Левица остро реагираше по повод нападот врз мировната мисија на Обединетите нации во Либан, при кој загина српскиот мировник Милован Јовановиќ, а беа повредени и други припадници на меѓународните сили. Од партијата оценуваат дека нападите врз персонал ангажиран под мандат на ОН претставуваат сериозен удар врз меѓународната безбедност и мировните напори на Блискиот Исток.
Во реакцијата, Левица посочува дека во рамките на мисијата УНИФИЛ се ангажирани и припадници на Армијата на Република Македонија, поради што, како што наведуваат, директно се загрозени и животите на македонските мировници.
„Нападите врз мировни мисии и персонал ангажиран под мандат на Обединетите нации претставуваат сериозно загрозување на меѓународната безбедност и директен удар врз напорите за зачувување на мирот на Блискиот Исток, што влијае на стабилноста на целиот свет“, се наведува во соопштението.
Од Левица упатија сочувство до семејството на загинатиот мировник Милован Јовановиќ и до српскиот народ, истакнувајќи дека безбедноста на сите мировници мора да биде гарантирана согласно меѓународното право.
Партијата изразува загриженост што, како што наведува, нападите врз мировната мисија на ОН се случуваат без соодветна реакција и последици за Израел.
„Недозволиво е меѓународните мировни сили да бидат доведени во ситуација да бидат колатерални жртви на воена агресија врз суверени држави“, истакнуваат од Левица.
Во реакцијата се оценува дека случувањата во Либан потсетуваат на, како што велат, методи применувани во Газа, при што се создава атмосфера на страв, несигурност и уништување на цивилната инфраструктура.
Левица бара Министерството за надворешни работи и Владата итно да излезат со официјална реакција и јасна осуда на нападот врз мировната мисија.
„Неопходно е до Амбасадата на Израел во Скопје да се упати официјален дипломатски протест поради загрозувањето на безбедноста на мировниците, меѓу кои се наоѓаат и македонски државјани ангажирани во меѓународна мисија под мандат на Обединетите нации“, наведуваат од партијата.
Од Левица додаваат дека остануваат противник на политиките кои, според нив, водат кон цивилни страдања, регионална дестабилизација и кршење на меѓународното право.
„Владата на Бенјамин Нетанјаху сноси апсолутна одговорност за предизвикување конфликти на Блискиот Исток и за создавање услови во кои страдаат цивили и мировници од различни националности“, се вели во реакцијата.
На крајот, од партијата порачуваат дека ќе продолжат да ги поддржуваат напорите за мирно решавање на конфликтите, почитување на меѓународното право и градење односи засновани на соработка и меѓусебно почитување меѓу народите.
