Левица реагираше на изјавата на гувернерот на Народната банка, Трајко Славески, во која тој изрази загриженост поради најавите за зголемување на надоместоците во платниот промет, оценувајќи дека станува збор за задоцнето признавање на проблем на кој партијата со години предупредува.
Од Левица сметаат дека банкарскиот сектор се претворил во олигопол кој остварува рекордни профити на товар на граѓаните и стопанството, додека истовремено ги зголемува трошоците за основните банкарски услуги.
„Изјавата на гувернерот Трајко Славески за загриженост од најавата за зголемување на надоместоците во платниот промет претставува задоцнето признание на еден подлабок проблем, што со години се игнорира. Банкарскиот сектор се претвори во олигопол што остварува рекордни профити на грбот на граѓаните и стопанството“, наведуваат од партијата.
Според Левица, во услови кога банките бележат историски високи добивки и високи каматни маржи, дополнителното зголемување на провизиите не може да се оправда со пазарни причини.
„Кога банките бележат историски високи добивки, кога каматните маржи се меѓу највисоките во регионот, а истовремено се зголемуваат и провизиите за основни платежни услуги, тогаш не станува збор за пазарна логика, туку за злоупотреба на доминантната позиција на финансискиот сектор“, се вели во реакцијата.
Партијата посочува дека речиси истовременото зголемување на надоместоците од страна на повеќе банки отвора сомнежи за можно координирано однесување и бара институциите да реагираат.
„Фактот што повеќе банки речиси истовремено ги зголемуваат надоместоците отвора сериозни сомнежи за координирано однесување. Доколку Комисијата за заштита на конкуренцијата не реагира навремено, се испраќа порака дека профитот на неколку финансиски институции е поважен од интересот на граѓаните“, наведуваат од Левица.
Оттаму оценуваат дека платниот промет претставува основна услуга неопходна за секој граѓанин и компанија и дека не е доволно банките само да бидат повикани да ги преиспитаат своите одлуки.
„Не е доволно само да се повикаат банките да ги преиспитаат своите одлуки. Потребни се конкретни мерки како законско ограничување на провизиите за основните платежни услуги, воведување пакет на бесплатни или симболично наплатливи услуги за граѓаните и засилен надзор врз можните картелски договори во банкарскиот сектор“, порачуваат од партијата.
Левица бара воспоставување јасна регулатива за работата на банките, оценувајќи дека во моменталните услови граѓаните се оставени на милост и немилост на финансиските институции.
„Вака граѓаните се оставени на (не)милост на банките, државата е без можност да интервенира во насока на заштита на обичниот човек, што овозможува апсолутна надмоќ на група луѓе врз целиот економски систем, чиј товар го носат граѓаните и пред сè работниците“, стои во реакцијата на Левица.
