Партијата бара Георгиевски да објави докази за поништениот конкурс и предлага рационализација на трошоците до завршување на реконструкцијата.
Левица реагираше на изјавите на градоначалникот на Град Скопје, Орце Георгиевски, во врска со поништениот конкурс за избор на директор на ЈУ „Универзална сала“, обвинувајќи го дека изнел невистинити информации и ја довел јавноста во заблуда.
Од партијата посочуваат дека Георгиевски тврдел оти конкурсот бил поништен затоа што се пријавил само еден кандидат со нецелосна документација, но според нив, јавно достапните информации отвораат сомнежи околу точноста на ваквото образложение.
„Го повикуваме градоначалникот јавно да ги поткрепи своите тврдења со конкретни докази и документи. Доколку навистина постоел само еден кандидат со нецелосна документација, нека ги објави официјалните податоци од постапката, бројот на пријавени кандидати и записниците врз основа на кои е донесена одлуката за поништување на конкурсот“, наведуваат од Левица.
Во реакцијата, партијата оценува дека случајот отвора и пошироко прашање – дали воопшто има потреба од избор на директор во институција чиј објект сè уште не е завршен и не ја извршува својата основна дејност.
„Во услови кога објектот на Универзална сала е далеку од завршен, сметаме дека Јавната установа на Град Скопје ‘Универзална сала’ треба привремено да се стави во мирување до целосното завршување на реконструкцијата, добивањето на сите неопходни дозволи и официјалното отпочнување со работа“, соопштуваат од партијата.
Според нив, нема оправданост за спроведување постапки за избор на директор, нови вработувања и создавање дополнителни административни трошоци за институција која моментално нема функционален објект и не работи во полн капацитет.
Левица предлага и сите постојни вработени во ЈУ „Универзална сала“ привремено да бидат распоредени во другите јавни установи под надлежност на Град Скопје.
„На овој начин ќе се обезбеди рационално користење на јавните средства и подобра искористеност на човечките ресурси, согласно потребите на институциите и квалификациите на вработените“, наведуваат од партијата.
Оттаму додаваат дека приоритет на градските власти треба да биде завршување и оспособување на институцијата, наместо кадровски решенија пред таа да започне со работа.
„Градот Скопје најнапред треба да ја изгради и оспособи институцијата. Сè друго претставува нереална мерка и задоволување на теснопартиски интереси и политичка кадровизација пред реалните потреби на културниот сектор“, се наведува во реакцијата на Левица.
