Советничката од Левица во Советот на Општина Охрид, Виолета Аврамовска, со жестока реакција по повод рушењето на куќата на Димитар Влахов, обвини дека со години Охрид се уништува во корист на профитерски интереси, додека институциите избегнуваат одговорност за урбанистичките политики кои го бетонизираат градот.
Во објава на социјалните мрежи, Аврамовска посочува дека надлежните институции и локалната власт се прогласиле за ненадлежни во случајот со рушењето на објектот, повикувајќи се на фактот дека куќата не била под заштита и дека урбанистичкиот план за локацијата бил донесен уште во 2008 година.
„Во име на профитот веќе дваесетина години се уништува најголемиот туристички центар во Македонија. Во име на профитот продолжи уништувањето на Охрид со носење ДУП-ови по мерка на профитерите“, наведува Аврамовска.
Таа предупреди дека на местото на срушениот објект најверојатно ќе никнат нови станбени згради, иако во непосредна близина се наоѓаат две училишта и детска градинка.
„Наместо дрвја, трева и зеленило, децата ќе гледаат згради, најверојатно без паркинг-простор, како и во секоја друга зграда која се гради во Охрид“, истакна советничката.
Аврамовска ја критикува и долгогодишната урбанизација на градот, оценувајќи дека профитот станал поважен од животната средина и квалитетот на животот на граѓаните.
„Во име на профитот продолжува да се бетонизира Охрид. Да можете, езерото ќе го исушите за што повеќе згради да изградите и што повеќе станови да продадете“, наведува таа.
Според неа, граѓаните своето незадоволство најчесто го изразуваат на социјалните мрежи, но нивните реакции остануваат игнорирани од носителите на власта.
Во објавата, Аврамовска укажува и на проблемот со загадувањето на воздухот, како и на, како што вели, узурпацијата на јавниот простор преку узурпирани тротоари и улици.
„Можете да ги ‘перете’ рацете и да се амнестирате од одговорност едни со други, СДСМ и ВМРО-ДПМНЕ, но не можете да ја исперете вистината дека секој градоначалник и секоја локална власт од осамостојувањето до денес го уништувавте Охрид“, порачува Аврамовска.
