Владата подготви закон со кој казината ќе мора да бидат оддалечени најмалку 500 метри од основните и средните училишта. Но, дали навистина ќе биде така, прашува пратеникот од редовите на Левица, Реџеп Исмаил.
„Еве како би изгледало ограничувањето доколку се применува по воздушна линија. Ова можеби не е најпрецизен приказ, но приближно тоа е дистанцата. Навидум, можеби ви изгледа дека цели делови од Скопје (Центар, Карпош, Аеродром) практично би станале недостапни за отворање казина“, вели Исмаил, објавувајќи и мапа на Скопје со означени делови каде што не би требало да има објекти за игри на среќа.
„Но, финтата е во тоа што во законот никаде не се споменува воздушна линија. Наместо тоа, се користи формулацијата „најбезбеден пат“ од училиштето до казиното. Токму тука е суштинската разлика. Во пракса, многу објекти што се наоѓаат непосредно до училишта по права линија може да останат легални поради подолг пристап преку улици, мостови, подземни премини или блокови на згради и други објекти.
Освен тоа, дури и на воздушната дистанца се гледа дека одредени критични точки низ градот ќе останат недопирливи, па тоа, освен што ќе создаде „креативни“ решенија за примена на дистанцата, речиси сигурно ќе доведе до создавање коцкарски оази во тие точки“, вели тој.
„Со други зборови, прашањето е дали целта е вистинско оддалечување на коцкарската индустрија од децата и младите (и зошто само од нив?!), или создавање закон што формално звучи строго, а остава простор за масовни исклучоци и практично има намера само да го „издува“ јавниот притисок.
Проблемот со прекумерното коцкање во Македонија е многу, многу сериозен. Годишниот обрт достигнува над 2,8 милијарди евра, сума што говори за огромни социјални и економски последици: зависност, семејни трагедии, долгови, сиромаштија и уништување на локалните заедници.
Затоа, суштината не е само дали ќе има „нов закон“, туку како точно ќе се мери и применува растојанието и дали јавниот интерес ќе биде пред профитот на коцкарската индустрија“, завршува Исмаил.
