Кина и Соединетите Американски Држави постигнале нови договори за продлабочување на политичката, економската и безбедносната соработка по самитот меѓу кинескиот претседател Си Џинпинг и американскиот претседател Доналд Трамп во Пекинг. Според шефот на кинеската дипломатија Ванг Ји, лидерите договориле изградба на „конструктивни односи на стратешка стабилност“, што Пекинг го оценува како нова рамка за идните кинеско-американски односи.
Кинескиот министер за надворешни работи Ванг Ји го оцени самитот меѓу Си Џинпинг и Доналд Трамп како „историски“, истакнувајќи дека станува збор за прва посета на американски претседател на Кина по девет години и прва директна средба на двајцата лидери по нивната средба во Бусан минатата година.
Според Ванг, централната политичка согласност меѓу двете страни е изградбата на „конструктивни кинеско-американски односи на стратешка стабилност“, кои треба да се темелат на соработка, управување со разликите и избегнување конфликти.
„Ниту една од двете земји не може да ја исклучи другата или да просперира без другата. Соработката носи придобивки, конфронтацијата носи загуби“, изјави Ванг.
Тој додаде дека Пекинг гледа на новата рамка како на модел во кој конкуренцијата нема да биде „игра со нулта сума“, туку простор за меѓусебно надминување и развој.
На самитот биле договорени и нови канали за соработка во областа на дипломатијата, трговијата, одбраната, јавното здравје, туризмот, земјоделството и меѓучовечките односи.
Ванг откри дека Си Џинпинг ја прифатил поканата на Трамп за државна посета на САД оваа есен, а двете страни се договориле да одржуваат редовна комуникација преку средби, телефонски разговори и писма.
Во економскиот дел, Кина и САД договориле формирање трговски и инвестициски одбори, проширување на трговската размена и намалување на царините врз реципрочна основа.
„Економските односи меѓу Кина и САД по својата природа се заемно корисни и добитни за двете страни“, истакнал Ванг.
На средбата биле отворени и глобални прашања, меѓу кои кризите на Блискиот Исток и во Украина. Пекинг повторно повикал на дијалог меѓу САД и Иран и побарал повторно отворање на Ормускиот теснец.
За Украина, Ванг изјавил дека и Кина и САД поддржуваат што поскоро политичко решение на конфликтот и ќе продолжат со координација околу мировните напори.
Прашањето за Тајван, исто така, било дел од разговорите. Кина повторила дека Тајван е нејзино внатрешно прашање и побарала Вашингтон да се придржува кон политиката „Една Кина“.
Во делот на меѓучовечките врски, Си Џинпинг најавил иницијатива за прием на 50.000 млади Американци во Кина во наредните пет години преку образовни и разменски програми.
„Иднината на кинеско-американските односи зависи од младите и од контактите меѓу народите“, изјавил Ванг, додавајќи дека двете земји сакаат да отворат „нова страница на пријателство“.
