Советничката од Левица во Советот на Град Скопје, Милица Давчева, на последната седница остро реагираше на предлог-одлуката за формирање Совет за детско престапништво, оценувајќи дека станува збор за формално тело кое не нуди сериозен и суштински пристап во справувањето со малолетничката деликвенција и девијантните појави кај младите.
Давчева истакна дека иако законски постои обврска за формирање на ваков совет, спорна е постапката со која однапред се избрани здруженијата и организациите кои ќе членуваат во него, без претходно распишување јавен повик, како што тоа се практикувало во минатите мандати.
„Во минатото се распишуваше јавен повик на кој можеа да се пријават организации и здруженија што работат на полето на малолетничката деликвенција. Денес веќе имаме однапред избрани организации, без транспарентна постапка и без можност за пошироко вклучување на стручната јавност”, посочи Давчева.
Таа оцени дека е недозволиво главниот град, кој се соочува со најголем број социјални проблеми и најголема концентрација на млади, да формира совет со само 13 члена, додека во помали општини, како Кисела Вода, ваквите тела имаат значително повеќе членови.
„Скопје е град со најмногу средни училишта, најголема концентрација на млади и најизразени социјални и економски разлики. Токму затоа е апсурдно Советот за детско престапништво да брои само 13 членови, без доволно широк и инклузивен состав”, нагласи таа.
Давчева посочи и дека во предложениот состав недостигаат стручни лица како психолози, педагози, социолози и дефектолози, кои, како што рече, се клучни за сериозен пристап кон проблемот со малолетничката деликвенција.
„Не можеме ова прашање да го третираме само правно и репресивно, преку судии и претставници на МВР. Потребен е поширок, социјален и стручен пристап, затоа што малолетничката деликвенција не се појавува сама од себе, туку е резултат на сиромаштија, социјална исклученост, нефункционален образовен систем и недостиг на перспектива за младите”, истакна таа.
Таа критикуваше и што во Советот нема претставници од средношколците, иако одлуките директно се однесуваат на младите.
„Носите одлуки за младите, а младите ги нема никаде во процесот. Тоа покажува дека оваа одлука е направена само формално, за да се исполни законската обврска, без вистинска стратегија и суштинска борба против детското престапништво”, порача Давчева.
Во своето обраќање, таа потсети и на последните случаи на насилство меѓу млади во Скопје, оценувајќи дека тие се последица на систем кој со години ги оттурнува младите на маргините, без доволно културни, спортски и психолошки содржини и поддршка.
„Никое дете не се раѓа како деликвент. Тоа е резултат на систем кој дозволува младите да растат во сиромаштија, неизвесност и социјална оттуѓеност. Без сериозен пристап и стручна поддршка, овој Совет ќе биде само уште едно тело за протоколарни состаноци, додека проблемите на терен ќе продолжат да ескалираат”, заклучи Давчева.
