Левица со сериозни обвинувања за состојбата на ЈЗУ Универзитетска клиника за хематологија, повикувајќи на итен вонреден инспекциски надзор по сведоштва од пациенти кои укажуваат на недостиг од терапии и основен медицински материјал, како и на, според партијата, опасен систем на управување со лекувањето.
Во реакцијата, Левица наведува дека до нив пристигнале „вознемирувачки сведоштва“ од пациенти кои со години се лекуваат на Клиниката за хематологија.
„Пациентите се соочуваат со недостиг од терапии, како и со недостиг од најосновни медицински материјали – шприцеви, стерилни ракавици, средства за дезинфекција и кеси за венепункција“, соопштија од Левица.
Особено загрижувачки, според партијата, се наводите дека лекарите морале да бараат одобрување од директорката Соња Генадиева Ставриќ за секоја терапија и интервенција преку телефонски повици и пораки.
„Со ова директно се суспендира стручниот авторитет на лекарите и се воведува недозволиво менаџерско самоволие во процесот на лекување“, стои во реакцијата.
Од Левица тврдат дека според сведоштвата, на дел од пациентите им биле кратени терапии спротивно на медицинските индикации.
„Пациенти на кои им биле потребни 10 ампули терапија добивале дозвола само за 3, со апсурдни инструкции да примаат ‘половични дози’“, наведуваат од партијата.
Партијата го повика директорот на Државен здравствен инспекторат, Кирил Лазов, веднаш да спроведе вонреден инспекциски надзор за состојбата со терапиите, набавките и начинот на носење одлуки на клиниката.
„Доколку овие застрашувачки наводи се точни и директорката штеди ресурси на сметка на животот и здравјето на пациентите, тогаш станува збор за тешко кривично дело за кое мора да има одговорност“, порачаа од Левица.
