Советникот на Левица во Општина Ѓорче Петров, Дејан Димовски, во гостување на дебатна емисија на ТВ21 жестоко ја критикуваше енергетската политика на државата во изминатите три и пол децении, оценувајќи дека Македонија направила „две големи енергетски предавства“ со продажбата на клучни енергетски капацитети.
Според Димовски, првото „енергетско предавство“ било продажбата на рафинеријата во Миладиновци, за која рече дека била продадена по цена од околу 32 милиони долари, додека државата подоцна плаќала и арбитражни казни од околу 40 милиони долари.
„Не дека ја продадовме, туку мислам дека ја подаривме. Денес тоа веќе не е енергетски ресурс со кој државата може да управува и да генерира политики“, изјави Димовски.
Тој како второ „енергетско предавство“ ја посочи продажбата на дистрибутивниот дел од енергетската мрежа, нагласувајќи дека приватните компании остваруваат милионски профити, додека државните енергетски претпријатија се соочуваат со големи долгови.
„Сите фирми на ЕВН во Македонија, според моите информации, оствариле профит од околу 60 милиони евра во 2024 година, додека ЕСМ има долг од околу 11,8 милијарди денари“, рече тој.
Димовски порача дека државата мора повторно да го стави јавниот интерес во фокусот на енергетските политики.
„Јавниот интерес се државните капацитети и народот да живее со многу подобар стандард“, нагласи советникот на Левица.
