Претседателот на Левица, Димитар Апасиев, преку објава на социјалните мрежи упати жестоки критики кон претседателот на Уставен суд на Република Македонија, Дарко Костадиновски, и судијката Добрила Кацарска, поради носење подзаконски правен документ именуван едноставно како „Акт“.
Во својот статус, Апасиев со иронија прашува „каков е тој акт“, посочувајќи дека во правната теорија и пракса секој подзаконски правен документ мора да има јасна форма и назив.
„Колку треба да си правно забеган – од нула до Дарко Костадиновски и Добрила Кацарска, да донесеш нешто што се вика АКТ на Судот!?“, напиша Апасиев.
Тој преку саркастична споредба со медицинска дијагноза се обиде да ја долови, како што оценува, апсурдноста на ваквото именување на правен документ.
„Тоа е исто како да отидете на лекар, и докторот да ви рече: ‘Вие имате дијагноза’. Добро докторе, а има ли име болеста? Има, да. Се вика „дијагноза“.?“, наведува лидерот на Левица.
Апасиев во објавата додава дека ваквото, според него, правно „логизирање и незнаење“ е една од причините поради кои државата губи бројни предмети пред Европски суд за човекови права.
„Со ваков калибар на судии и нивното правно логицирање и (не)знаење, секоја година губиме двоцифрен број спорови пред Европскиот суд за човекови права во Стразбур“, порача Апасиев.
