Нов извештај на Center for Economic and Policy Research (CEPR) тврди дека заострените американски санкции кон Куба веројатно се главната причина за значителниот пораст на смртноста кај новороденчињата во периодот од 2018 до 2025 година.
Според анализата на институтот со седиште во Вашингтон, смртноста кај новороденчињата во Куба се зголемила за 148 проценти во наведениот период. Во извештајот се наведува дека доколку стапката на смртност останела на нивото од пред 2018 година, околу 1.800 бебиња помалку би починале.
Авторите на извештајот посочуваат дека здравствените показатели на Куба до вториот мандат на Доналд Трамп биле споредливи со европските земји, а во одредени сегменти и подобри од оние во САД.
Директорот за меѓународна политика на CEPR, Александар Мејн, кој е еден од авторите на извештајот, изјави дека политиката на „максимален притисок“ врз Куба имала сериозни последици врз цивилното население, особено врз децата.
Тој предупреди дека состојбата можеби дополнително се влошува поради актуелните ограничувања и блокади поврзани со снабдувањето со гориво, што, според него, дополнително го отежнува функционирањето на здравствениот систем во земјата.
