Скандалот поврзан со летот на “Аустриан ерлајнс” од јуни 2024 година добива нова правна димензија, откако Обвинителството во Виена отвори почетна истрага против двајца новинари и еден државен службеник. Тие се сомничат за откривање доверливи информации, но засега се водат како осомничени, без поднесени обвиненија и без цврсти докази за кривична одговорност.
Истрагата се фокусира на тоа дали новинарите добиле чувствителни податоци од службеник во безбедносната истражна служба при Министерството за транспорт и дали тие информации биле незаконски споделени. Според наводите, станува збор за податоци поврзани со воздухопловни инциденти, вклучително и случаи на принудни слетувања и несреќи со човечки жртви. Доколку се потврди дека станува збор за неовластено откривање, тоа би претставувало сериозно прекршување на прописите за заштита на службени податоци.
Во центарот на посериозните сомнежи е службеникот, кој според истрагата, лажно се претставувал како водечки истражител и барал документи без соодветно овластување. Дополнително, тој наводно имал контакт со новинарите и им доставувал интерни информации, како и неовластено ја посетил оштетената авиомашина. Во истрагата е вклучен и адвокат кој ги застапувал патниците од спорниот лет, со цел да се утврди дали постоела поширока координација.
Случајот започнал по анонимна пријава доставена до службите за државна безбедност, во која биле изнесени сериозни, но според обвинителството, претерани обвинувања, вклучително и наводи за загрозување на воздухопловниот сообраќај и терористички намери. Од обвинителството појаснуваат дека ваквите тврдења не се предмет на актуелната постапка.
Отворањето на истрагата предизвика реакции кај новинарските здруженија, кои предупредуваат дека ваквите постапки можат да создадат притисок врз истражувачкото новинарство и да ја загрозат слободата на медиумите. Според нив, новинарите мора да имаат можност да работат во јавен интерес без страв од кривичен прогон, особено кога станува збор за откривање на можни институционални пропусти.
Во позадина на случајот е инцидентот со авионот на „Аустриан ерлајнс“, кој и покрај сериозните оштетувања при силно невреме, успешно слета во Виена без повредени патници. Иако претходните истраги за евентуални институционални пропусти беа затворени, новите сомнежи повторно го враќаат случајот во фокусот на јавноста.
