И покрај најавите за воведување на новиот ЕЕС (Entry/Exit System) на Европската унија, српските државјани кои планираат да патуваат во Грција ова лето ќе бидат делумно изземени од неговата целосна примена.
Според информациите од европски извори и регионални медиуми, имплементацијата на системот ќе се одвива постепено, што значи дека на одредени гранични премини, особено оние со зголемен туристички сообраќај, новите правила нема веднаш да стапат во сила во полн обем.
ЕЕС системот предвидува дигитална регистрација на влез и излез од Шенген зоната за државјани од трети земји, со цел подобра контрола на престојот и зголемена безбедност. Тој вклучува и биометриски податоци како отпечатоци од прсти и фотографирање на патниците.
Сепак, поради технички и логистички предизвици, како и потребата од прилагодување на инфраструктурата на граничните премини, властите одлучиле да применат транзициски период. Ова практично значи дека српските туристи, кои традиционално во голем број летуваат во Грција, нема да се соочат со значителни задржувања или нови процедури на сите премини.
Грчките туристички работници веќе изразија загриженост дека строгата и ненадејна примена на ЕЕС може да влијае негативно врз сезоната, особено имајќи предвид дека туристите од Србија се меѓу најбројните гости.
Надлежните институции апелираат до патниците да бидат информирани и да ги следат официјалните известувања, бидејќи системот ќе се воведува фазно и правилата може да се менуваат во текот на летото.
