На денешен ден, 28 април 1918 година, во затвор во чешкиот град Терезин починал Гаврило Принцип, личност чие име засекогаш остана запишано во светската историја.
Принцип бил припадник на револуционерното движење „Млада Босна“ и е познат како извршител на атентатот врз австроунгарскиот престолонаследник Франц Фердинанд на 28 јуни 1914 година во Сараево. Настанот, познат како Атентатот во Сараево, претставувал повод за почеток на Првата светска војна, глобален конфликт што го промени текот на 20 век.
По апсењето, Принцип бил осуден на 20 години затвор, бидејќи во моментот на атентатот бил малолетен според тогашните закони. Во затворските услови во Терезин, изложен на тешка болест, неухранетост и сурови услови, неговата здравствена состојба значително се влошила. Починал на само 23-годишна возраст.
Историските оценки за ликот и делото на Гаврило Принцип и денес се поделени. Сепак останува запаметен како борец против империјалната власт и симбол на слободарските стремежи. И повеќе од еден век подоцна, името на Принцип останува предмет на дебата, но и неизоставен дел од колективната меморија на Балканот и Европа.
