Синдикатот на УПОЗ реагира на одлука донесена на последната седница на Судско-буџетскиот совет, оценувајќи дека со неа судските службеници се ставени во нееднаква положба во однос на други вработени во судската власт.
Според реакцијата, иако сите вработени во судската власт се финансираат од ист буџет, со одлуката не се предвидени средства за додатоци на плата за вработените во судовите, додека, како што наведуваат од Синдикатот, средства се обезбедени за вработените во Судски совет и Академија за судии и јавни обвинители.
Од Синдикатот посочуваат дека ваквата одлука претставува дискриминација и укажуваат дека, според нив, се доведува во прашање принципот на еднаков третман, повикувајќи се и на член 32 од Уставот. Во реакцијата се наведува дека ваквиот пристап негативно влијае врз мотивираноста на вработените и дополнително го продлабочува проблемот со одлив на кадар од судовите.
Синдикатот бара Судско-буџетскиот совет да ја преиспита и коригира одлуката, со обезбедување средства за додатоци на плата за сите судски службеници за месец март, како и за целата 2026 година.
Во прилог на реакцијата, Синдикатот на УПОЗ доставил и официјално барање до Судско-буџетскиот совет со кое бара, како што наведуваат, отстранување на неправдата и еднаков третман за сите судски службеници.
