Вирална фотографија предизвика негодување, вклучително и кај американски конзервативци кои сè почесто ги осудуваат израелските постапки во регионот. Фотографија на која се гледа израелски војник како со пневматски чекан уништува статуа на Исус на крст во јужен Либан стана вирална на социјалните мрежи во неделата.
Израел окупираше неколку области во јужен Либан откако започна војна против земјата на 2 март. Прекинot на огнот стапи во сила во петокот.
Припадници на христијанската заедница велат дека статуата се наоѓа во селото Дебел, маронитски христијански град оддалечен околу шест километри северозападно од Аин Ебел и приближно пет километри од израелската погранична заедница Штула.
Фотографијата веднаш предизвика бурни реакции на интернет, вклучително и кај некои поранешни сојузници на американскиот претседател Доналд Трамп.
Поранешната републиканска конгресменка Марџори Тејлор Грин иронично напиша на платформата X под фотографијата: „Нашиот ‘најголем сојузник’ кој секоја година зема милијарди од нашите даночни пари и оружје.“
Грин, некогашна сојузничка на Трамп, оттогаш се сврте против американскиот претседател поради случајот „Епштајн“ и неговата одлука да ја следи израелската политика во војната со Иран, што таа јавно ја осуди.
Слично, Мет Гец, поранешен републикански конгресмен, ја опиша фотографијата како „ужасна“.
Реакциите од личности блиски до движењето МАГА веројатно дополнително ќе го нарушат имиџот на Израел кај една од неговите најсилни поддржувачки бази во САД, евангелистичките христијани.
Регионалниот аналитичар Мухамед Шехада ја коментираше фотографијата со описот „Јудео-христијански вредности во Израел“, алудирајќи на фраза што Израел често ја користи за да обезбеди поддршка на Западот.
Општината Дебел за АФП изјави дека статуата се наоѓа во селото, но не можела да потврди дали е оштетена.
Под израелска власт, христијаните во Израел и на окупираниот Западен Брег се соочуваат со зголемен бран напади, од секојдневно вознемирување до уништување на верски објекти.
Свештени лица пријавиле плукање и физички напади, додека цркви, гробишта и други христијански симболи биле вандализирани.
Овие напади, често поврзувани со ултраортодоксни Евреи, верски националисти и доселеници, честопати остануваат неказнети, при што израелската полиција се обвинува дека не интервенира.
Одговарајќи на најновиот инцидент, портпарол на израелската армија не ја негираше автентичноста на фотографијата, наведувајќи на платформата X дека „доколку оваа фотографија навистина е реална и неодамнешна“, тогаш таа не е во согласност со „вредностите“ на армијата.
