Културните работници ќе ги искористат сите расположливи механизми за да спречат евентуално укинување на Колективниот договор, а доколку сепак дојде до таква одлука, правдата ќе ја бараат и пред Европски суд за човекови права во Стразбур. Ова го изјави претседателката на Синдикатот на културните работници (СКРМ), Вера Атанасовска, по денешниот протест во Скопје.
Атанасовска нагласи дека приоритет на синдикатот е да не се дозволи Уставен суд да го укине Колективниот договор за култура, оценувајќи дека тоа би имало сериозни последици врз правата на вработените.
„Ќе се бориме на сите можни начини, и преку преговори и преку синдикални методи, за да не дозволиме укинување на Колективниот договор“, изјави таа.
Според неа, евентуалното укинување би претставувало преседан, не само во земјата туку и пошироко во европски контекст.
„Тоа би значело дека ќе бидеме единствена европска држава што укинала колективен договор и го погазила принципот на колективно договарање“, посочи Атанасовска.
Таа предупреди дека ваквата одлука би можела да создаде и правен вакуум, во кој вработените во културата би се соочиле со неизвесност околу исплатата на платите и остварувањето на основните работнички права.
„Укинувањето на Колективниот договор значи укинување на веќе стекнати права. Тоа е нешто што не смееме да го дозволиме“, истакна претседателката на СКРМ.
Во однос на постапката пред Уставниот суд, Атанасовска изрази сомнеж во конзистентноста на институцијата, потсетувајќи дека истиот договор веќе двапати бил оспоруван, но и потврден како уставен и законски.
„Сега, по промената на власта, гледаме промена во реториката и аргументацијата, што отвора сомнежи дека во позадина има други причини“, рече таа.
Атанасовска изрази очекување дека судот ќе донесе одлука врз основа на правото и претходната пракса.
„Се надеваме дека ќе преовлада разумот, правдата и законите, и дека нема да се донесе ваква, како што ја оценуваме, срамна одлука“, додаде таа.
Доколку сепак дојде до укинување на Колективниот договор, Синдикатот најавува дека ќе ги исцрпи сите правни можности на домашно ниво, по што ќе се обрати до Европскиот суд за човекови права.
„По одлука на Уставниот суд, единствена можност ни останува Стразбур. Таму ќе ја бараме правдата, имајќи предвид дека веќе постои пресуда во сличен случај“, нагласи Атанасовска.
Протестот на културните работници доаѓа во услови на зголемени тензии меѓу синдикатите и институциите, поради, како што тврдат од СКРМ, непочитување на Колективниот договор од страна на Министерството за култура и туризам, предводено од Зоран Љутков.
Културните работници најавуваат дека нивната борба ќе продолжи сè додека не се обезбеди целосна заштита на нивните права и зачувување на Колективниот договор.
