Пратеничката од Левица, Јована Мојсоска, на својот Фејсбук профил обвини за недоследности и нетранспарентност во најавите за изградба на новата болница во Кичево, посочувајќи дека институциите даваат различни информации за изворот на финансирање. Таа реагира откако, и покрај претходните тврдења на премиерот Христијан Мицкоски дека проектот ќе се заврши за две години и ќе се реализира со средства од т.н. британски кредит, директорката на кичевската болница изјавила дека изградбата ќе се финансира преку Светска банка.
Минатата година Мицкоски најави дека за 2 години ќе биде изградена новата болница во Кичево со пари од британскиот кредит. Што значи дека наредна година новиот клинички центар треба да биде целосно пуштен во употреба (иако на терен речиси и да нема активности).
Вчера директорката на кичевската болница изјави дека новата болница ќе се гради со пари од СВЕТСКА БАНКА, иако Владата на Мицкоски во неколку наврати изјави дека се обезбедени пари од фамозниот БРИТАНСКИ кредит (кој упорно го крие од јавноста)?! Па, каде се парите од британскиот кредит или ги потрошивте на предизборен поткуп и за вашите фирми-пајташи преку кои го цедите буџетот за приватни раскоши?!
Патем, АЛИУ е 19-ти(!) министер кој ветува изградба на болница во 21 век, ама сепак да не бидеме нихилисти, што би рекол премиерот. Брзо ќе дојде и наредна година, па можеби ќе стане појасно каде завршиле парите од штетниот британски кредит со кои Мицкоски ги задолжи идните генерации (очигледно НЕ во кичевската болница).
