Растот на цените во Македонија продолжува да го притиска секојдневниот живот на граѓаните, покажуваат најновите податоци на Државниот завод за статистика за март 2026 година. Според официјалните бројки, индексот на трошоците за живот во однос на февруари е зголемен за 0,7%, а на годишно ниво растот достигнува 4,9%.
Економистите предупредуваат дека овие проценти не ја покажуваат целата реалност. За семејство без луксуз, според синдикалната минимална кошница (СМК), месечно се потребни речиси 70.000 денари само за основни потреби, храна, пијалаци, домување, транспорт, облека и образование. За споредба, просечната нето-плата во земјата изнесува околу 46.000 денари, што значи дека дури и ако двајцата возрасни членови на семејството земат просечна плата, најголемиот дел од приходот оди за основни трошоци.
Добро е ако во семејството има двајца со просечна плата, но проблемот е многу поголем кај минималните плати, пензионерите и работниците во приватниот сектор, посочува економистот Џевдет Хајредини. Голем број пензионери немаат доволно приход за да ја покријат минималната потрошувачка кошничка, а платите не го следат растот на цените во маркетите.
Најизразено поскапување е забележано кај храната и транспортот. Според податоците на синдикатите, околу 26.000 денари месечно се потребни за храна и безалкохолни пијалаци, 6.500 денари за сметки, 5.000 денари за транспорт, и околу 6.000 денари за облека и обувки. Кумулативно, ова создава реален притисок врз буџетите на домаќинствата, кои ретко можат да го намалат трошокот без да го загрозат квалитетот на животот.
Инфлацијата е „тивка“, но континуирана , додаваат од Сојузот на синдикати на Македонија. Малите месечни зголемувања се акумулираат и се концентрирани во категории кои не можат да се избегнат: транспорт, храна, домување. Ова дополнително ја намалува куповната моќ на граѓаните.
Експертите предупредуваат дека трендот на поскапување веројатно ќе продолжи, особено со глобалните зголемувања на цените на горивата и стратегиските производи, како нафта, пченица и ѓубрива, што директно влијае врз земјоделството и прехранбената индустрија.
