Во среда (8 април) во Културно информативниот центар – Скопје ќе се одржи промоцијата на романот „Извештајот на Рената“ од Кристина Краличин. Книгата ќе ја промовираат Билјана Црвенковска и авторот.
Во зелените појаси и речните богатства на Африка, каде што корените на дрвјата баобаб ги прегрнуваат тајните на исчезнатите цивилизации, започнува патувањето на Рената Браун – млад и генијален археолог и палеограф, чие истражување на мистеријата од старите записи ја вовлекува во неизвесност. Како што се приближува до откритието на клучните факти, Рената се наоѓа на линијата помеѓу научната експертиза и личните ризици, каде секој чекор ја носи поблиску до откривањето на вистината во записите.
„Извештајот на Рената“ е повеќе од обичен крими роман – тоа е вешто споена комбинација на научни принципи, историски настани и археолошки истражувања, која поставува прашања за минатото, но и за самиот човечки дух. Овој роман го истражува човечкото стремење кон знаење, како и неизвесноста која го придружува во потрагата по откритија кои можат да се претворат во искушенија. Во дилемата помеѓу нејзината должност како истражувач и опасностите на откритието што носи последици, Рената мора да одлучи до кој степен е подготвена да се впушти во мистеријата што може да ја промени не само нејзината кариера, туку и нејзиниот живот.
Промоцијата на романот „Извештајот на Рената“ ќе биде збогатена со изложба на 10 акрилни слики на платно од уметницата Жаклина Николовска, создадени како визуелна рефлексија на темите, ликовите и просторот во кој се одвива дејството на романот – Јужноафриканската Република.
Преку оваа синергија на литературата и ликовната уметност, настанот нуди заокружено уметничко доживување, во кое текстот и сликата се надополнуваат, отворајќи нови слоеви на интерпретација и емоција.
Кристина Краличин е македонска писателка, поетеса и романсиерка со изразено национално и меѓународно присуство. Таа е дипломиран професор по италијански јазик и книжевност и американски студии (Филолошки факултет „Блаже Конески“, Скопје), магистер по европски студии и меѓународна економија, како и алумни на Tufts University – Fletcher School (САД), од областа на лидерство и финансиска инклузија.
Авторка е на 11 објавени книги – шест збирки поезија и пет романи, објавени на македонски, италијански и англиски јазик, во земјата и странство. Нејзиното книжевно творештво е застапено во бројни меѓународни антологии, а дел од прозата е предмет на научна и фразеолошка анализа во рамки на современата македонска литература.
Во октомври 2025 година е назначена за Амбасадорка на Стародавната Академија на Парнас за земјите на Балканот (Каникати, Италија), како признание за високата уметничка и културна вредност на нејзиното творештво. Добитничка е на повеќе меѓународни книжевни награди и признанија за поезија во Италија, со први награди, финалистички пласмани и почесни спомнувања.
Краличин е основоположник и организатор на регионалниот поетски конкурс „Арс Лирика Балканика“, замислен како долгорочна платформа за афирмација, вмрежување и меѓукултурен дијалог меѓу современите поети од Балканот, со јасна ориентација кон книжевна извонредност и културна соработка.
