Во тек е обемна спасувачка акција во Хрватска, каде што десетици лица се заглавени во мочурлив дел од реката Сава, на подрачјето меѓу Штитар и Бабина Греда. Според првичните информации, станува збор за мигранти кои се обиделе незаконски да ја преминат државната граница.
Потпретседателот на Владата и министер за внатрешни работи Давор Божиновиќ потврди дека во акцијата се вклучени сите расположливи служби, полицијата, цивилната заштита, пожарникарите, Хрватската горска служба за спасување, Црвениот крст и Државната интервентна единица.
„Во овој момент трае голема спасувачка акција. Луѓето се заглавени во мочурливиот дел околу Бабина Греда. Ангажирани се практично сите сили, а теренот е исклучително тежок и непристапен“, изјави Божиновиќ.
Според проценките, станува збор за десетици лица. Дел од нив веќе се лоцирани, но спасувачите се соочуваат со сериозни предизвици поради слабата видливост и специфичниот терен, поради што се користат и термовизиски камери. Иако од теренот се слушаат гласови на заглавените, постои стравување дека може да има и жртви.
Министерот посочи дека најверојатно станува збор за мигранти, сценарио со кое надлежните служби се соочуваат со години при обидите за илегално преминување на границата. Тој потсети дека минатата година биле регистрирани 14 смртни случаи, додека годинава веќе се евидентирани два случаи на давење.
Од полицијата во Вуковарско-сремската жупанија информираат дека рано утринава биле известени за присуство на повеќе лица во реката, по што веднаш биле испратени полициски патроли, чамци и дронови за нивно пронаоѓање и спасување.
Во акцијата се вклучени и цивилната заштита, спасувачките тимови, како и Итната медицинска помош, а напорите продолжуваат со цел што побрзо извлекување на заглавените лица и минимизирање на евентуалните последици.
