Пратеникот од Левица, Амар Мециновиќ, во објава на социјалните мрежи упати остри критики кон, како што вели, „ултра-богатите“ во Македонија, обвинувајќи ги дека своето богатство не го стекнале исклучиво преку лична способност, туку преку злоупотреби и системска поддршка.
Мециновиќ посочува дека дел од најбогатите, според него, профитирале преку сомнителни приватизации, државни тендери, финансиски шпекулации и прекршување на работничките права, како и преку влијание врз судството и законите. Тој додава дека ваквата состојба е резултат на, како што наведува, три децении политики кои фаворизирале мала група семејства.
Во својата објава, пратеникот прави споредба меѓу животот на богатите, кои „се шетаат по Монте Карло“, и секојдневието на граѓаните кои, според него, се соочуваат со ниски плати и високи трошоци за живот, вклучително и сметки за гориво и електрична енергија.
Мециновиќ повикува на формирање на „анти-олигархиска влада“, која би спровела политики на повисоко оданочување и прераспределба на богатството. Според него, ваквите мерки би овозможиле подобрување на здравството, образованието и јавните услуги, како и поголема транспарентност и независност на институциите.
Тој заклучува дека државата треба да обезбеди еднакви можности за сите граѓани, во спротивно, како што вели, таа станува инструмент во рацете на „предаторите“.
