Александар Симонов, член на президиумот на Левица, преку јавна објава, остро го критикуваше актуелниот политички систем и односот на владејачките партии кон клучните економски и социјални проблеми. Според него, „дефокус во отсуство на аргументација“ е техника која очајнички ја користеле СДСМ, а сега ја применува и ВМРО, секогаш кога се „пеглани“ на говорница, што, како што вели Симонов, е класично признавање на пораз и немоќ за спротивставување.
Тој додава дека „шизофрениот бипартизам“ цело време не може да се договори сам со себе, кој што основал, кој плаќал, кој формирал, кој креирал, а политичките лаги за Левица, според него, би биле решени до сега ако биле вистина: или ќе била власт или нема да постоела.
Симонов посочи и дека дел од јавноста, убедена во либерално наметнатиот аргумент „сè политичко е нужно лошо“, ја прифаќа оваа манипулација. Но, загрижувачки е, како што вели, и медиумската клика, особено „Алфа ТВ“, која политички служи на партиите и се исклучува од реалниот свет, претворајќи се во „талог“ на општеството, играјќи извитоперена игра што ја игнорира вистинската критика и решавање на проблемите.
Главниот фокус на Симонов беше економската и егзистенцијална криза со станбеното прашање за младите. Тој истакна дека нереално високите цени на становите, полошите банкарски услови и можноста странски корпорации да ги купуваат и држат становите за профит создаваат „легитимно должничко ропство“ за младите семејства.
„Млад човек не може да основа семејство и да го реши станбеното прашање без тоа егзистенцијално да го загрози“, објаснува Симонов, нагласувајќи дека институциите наместо да обезбедат алтернативни решенија, одговараат со апсурдни обвиненија или политички замајувања.
Тој ја критикуваше и практиката на власта со проекти прогласени за јавен интерес, кои овозможуваат олигархија да гради хотели, да увезува евтина работна сила и да ги намалува давачките кон државата, со што се зголемуваат социјалните и економските неправди.
„Додека отвораш егзистенцијално важни прашања, квази медиумите ја сведуваат дебатата на трачарење и ја прикажуваат еднострано како одраз на владејачката забеганост“, предупреди Симонов, додавајќи: „Пу јаз’к, кај се родивме, од кај одлучивме да не се иселиме!“
