Регулаторната комисија за енергетика денеска се очекува да ја објави новата одлука за малопродажните цени на горивата во земјава, откако на светските пазари беше забележан раст на цената на нафтата поради зголемените воени дејствија на Блискиот Исток.
Во текот на изминатата недела, глобалните пазари на енергенси беа под силно влијание на геополитичките случувања во регионот. Референтната цена на суровата нафта „брент“ достигна околу 104 долари за барел, што дополнително ги зголеми очекувањата за поскапување на горивата.
Аналитичарите предупредуваат дека трендот на раст на цените може да продолжи доколку се продлабочи нестабилноста на Блискиот Исток, што би можело да има пошироки економски последици.
Освен поскапувањето на нафтата, се очекува актуелната ситуација да предизвика и ценовен притисок врз други производи, имајќи предвид дека трошоците за транспорт и енергија директно влијаат врз цените на пазарот.
