Иранскиот министер за надворешни работи Абас Арагчи изјави дека Иран нема да прифати прекин на огнот доколку не се постигне траен крај на војната, нагласувајќи дека борбата ќе продолжи сè додека не се гарантира безбедноста на иранскиот народ.
Арагчи посочи дека Иран и претходно бил под притисок да се предаде, потсетувајќи дека минатата година, по нападот на Израел, тогашниот американски претседател Доналд Трамп зборувал за „безусловно предавање“. Според него, тоа не се случило, бидејќи Иран се спротивставил на нападите.
„Ние се спротивставивме и по дванаесет дена токму Израел побара безусловен прекин на огнот. Затоа никогаш нема да се предадеме. Ќе се спротивставуваме онолку долго колку што е потребно“, изјави Арагчи, додавајќи дека Иран ја брани својата територија, народот и достоинството, кое, како што рече, „не е предмет на преговори“.
Тој нагласи дека во моментот не се исполнети условите за завршување на војната и дека сегашната ситуација е различна од претходните конфликти. Според него, во минатото Израел прво нападнал, при што загинале цивили и била уништена инфраструктура, а потоа бил побаран прекин на огнот.
„Тогаш го прифативме прекинот на огнот во добра намера, бидејќи се браневме. Кога агресијата запре, запревме и ние. Но тоа не доведе до мир“, рече иранскиот министер.
Арагчи обвини дека и годинава повторно биле извршени напади во кои, како што тврди, загинале цивили, меѓу кои и девојчиња и студенти. Тој додаде дека биле погодени болници, постројки за десалинизација на вода, рафинерии и други објекти, при што има жртви и голема материјална штета.
„Сега повторно бараат прекин на огнот. Тоа не може да функционира така. Мора да се воспостави траен крај на војната, а до тогаш е неопходно да продолжиме да се бориме за безбедноста на нашиот народ“, истакна Арагчи.
Тој додаде дека пред какви било разговори за прекин на огнот, според Техеран, мора да се објасни зошто воопшто започнала агресијата. Арагчи нагласи дека никој не сака продолжување на војната, но дека, според него, конфликтот бил наметнат од Соединетите Американски Држави и Израел.
„Ова не е наша војна и не беше наш избор. Таа ни беше наметната. Нападот започна без провокација, без оправдување и спротивно на меѓународното право. Она што го правиме е легитимна одбрана и имаме целосно право да се браниме“, рече тој.
