Министерот за енергетика на Катар предупреди дека војната на Блискиот Исток може да предизвика сериозен глобален економски шок, оценувајќи дека извозот на енергенси од земјите во Персискиот Залив би можел да биде прекинат во рок од неколку дена, што би довело до нагло зголемување на цената на нафтата до 150 долари за барел.
Министерот Саад ал‑Кааби изјави дека дури и ако борбите веднаш престанат, на Катар би му биле потребни недели или месеци за целосно да ги обнови нормалните испораки на течен природен гас (LNG). Причината за тоа е напад со дрон, за кој се тврди дека е ирански, врз енергетскиот комплекс Рас Лафан – клучен центар за производство и извоз на гас во земјата.
По нападот, Катар – вториот најголем извозник на LNG во светот – прогласи виша сила (force majeure), што им овозможува на компаниите привремено да ги суспендираат договорните обврски поради вонредни околности.
Ал-Кааби предупреди дека доколку конфликтот продолжи, и други извозници на енергенси од Персискиот Залив би можеле да се соочат со слични проблеми. Според него, ако не ги суспендираат договорите навреме, производителите ризикуваат значителни правни последици поради неисполнување на испораките.
Иако Катар испорачува релативно ограничени количини гас кон Европа, европските земји сепак би се соочиле со сериозни последици. Според проценките, азиските купувачи би можеле да ги наддадат европските за достапните количини гас, додека производителите од Заливот би се бореле да ги исполнат постојните договори.
Ескалацијата на тензиите меѓу САД, Израел и Иран веќе ги потресе енергетските пазари. Цената на нафтата од типот Брент се искачи на 87,6 долари за барел, додека цените на природниот гас во Европа исто така бележат раст.
Според катарскиот министер, последиците од конфликтот може да бидат глобални – со повисоки цени на енергијата, недостиг на снабдување и нарушувања во индустриското производство.
„Ова може да доведе до пад на економиите во светот“, предупреди Ал-Кааби.
