Сојузот на синдикати на Македонија (ССМ) денеска ја блокираше улицата пред Стопанската комора, испраќајќи порака до работодавачите дека платите во земјава се „мизерни“ и далеку од минимумот потребен за достоинствен живот.
Претседателот на ССМ, Слободан Трендафилов, на почетокот на протестот им посака „добро утро на сите освен на работодавачите“, повторувајќи ја пораката што претходно ја упати и кон пратениците пред Собранието.
Тој истакна дека работодавачите мора да разберат дека нивни партнери се работниците, но дека незадоволството може да прерасне во посериозен отпор.
„Газдите мора да сфатат дека имаат пријатели само во работниците, но може да имаат и непријатели. Во најголем дел од приватниот сектор не дозволуваат синдикално организирање. Само еден од десет работници се бори за повисоки плати. Замислете што ќе беше ако осум од десет се бореа. Ако од 540.000 работници 100.000 излезеа на улица, дали ќе требаше да продолжуваме со блокадите и да размислуваме за генерален штрајк?“, рече Трендафилов.
Тој нагласи дека понудата за зголемување на платите за 6.000 денари останува отворена, заедно со предлогот Владата да ги покрие придонесите за тоа зголемување.
„Понудата е сè уште на маса и ја кажуваме од улица. Следниот пат нема да дојдеме со понуда, туку со генерален штрајк“, порача Трендафилов.
Потпретседателот на ССМ за приватниот сектор, Иван Пешевски, повика на итен дијалог со работодавачите и побара минималната плата да изнесува 600 евра.
„Да заборавиме на плата од 400 и 500 евра. Со такви примања нема да имаме ниту продуктивни, ниту било какви работници. Ако газдите не дадат дел од профитот што им го овозможиле работниците, секој ден ќе бидеме на улица со блокади и шатори и ќе потсетуваме дека за тие плати повеќе нема да работиме“, изјави Пешевски, додавајќи дека условите во приватниот сектор се недостојни и дека платите повеќе личат на социјална помош отколку на заработка.
Од ССМ најавија дека протестните активности ќе продолжат, а во вторник е планирана блокада на приодите кон Владата.
