Илјадници демонстранти излегоа на улиците на главниот град на Аргентина, Буенос Аирес, во знак на протест против предложените трудови реформи што, според синдикатите, ќе го ограничат правото на штрајк и ќе ги намалат бенефициите за вработените.
Протестите се одржаа додека Сенатот расправа за законодавството поддржано од „либертаријанскиот“ претседател Хавиер Милеи. Владата тврди дека реформите се неопходни за спроведување на економска агенда заснована на слободен пазар и намалување на регулативите.
Синдикатите, пак, сметаат дека станува збор за обид за слабеење на организираното работничко движење. Генералната конфедерација на трудот (CGT), коалиција на синдикати која помогна во организирањето на протестите, ги оцени реформите како напад врз работничките права.
„Тоа не е модернизација. Тоа е угнетување на работниците“, се наведува во нивното соопштение.
Според предложените измени, на компаниите би им се олеснило отпуштањето на работници и би се намалиле отпремнините. Дополнително, би се ограничила можноста на синдикатите да учествуваат во колективното договарање.
Демонстрациите во центарот на Буенос Аирес прераснаа во судири со полицијата. Безбедносните сили употребија водни топови, солзавец и гумени куршуми за да ги растераат насобраните, додека дел од демонстрантите фрлаа камења, шишиња и молотови коктели.
Тензиите околу реформите дополнително ја продлабочуваат политичката поделба во земјата, додека Сенатот треба да донесе одлука за спорниот закон.
