Следи го Антропол преку Google Во емисијата „24 Анализа“ на ТВ24, инженерот Дејан Димовски потенцира дека независноста на Македонија во 1991 година не била резултат на силна војска, влијателна држава или развиен монетарен систем, туку на стабилниот електроенергетски систем и стручното знаење на инженерите и техничкиот кадар од повеќе факултети.
„Тогаш имавме стручен кадар од Машинскиот, Електро, Градежниот и Технолошко-металуршкиот факултет, којшто ја создаваше основата за развој и изградба на енергетскиот систем“, изјави Димовски.
Тој нагласи дека Македонија не го искористила потенцијалот на големите домашни компании, кои доколку биле вклучени во големите енергетски проекти како Бетон, Маврово, Пелагонија и Гранит, можеле да го продолжат својот век на економско опстојување и да придонесат за изградба и надградба на енергетските капацитети.
„Македонија триесет години разговара што ѝ треба, но конечно треба да тргне и да гради. Изградбата на енергетски капацитети носи стабилна држава, развој и напредок во сите сегменти“, заклучи Димовски.
