По повод 154 години од раѓањето на македонскиот револуционер и национален херој Гоце Делчев, делегација на партијата Левица денеска положи свежо цвеќе на неговото вечно почивалиште во Скопје.
Делегацијата беше предводена од пратениците Јована Мојсоска и Саше Јанчев, кои со чинот на оддавање почит го истакнаа значењето на Делчев како симбол на македонската слобода и борбата за национална самостојност.
Од Левица посочуваат дека делото на Гоце Делчев претставува темел на македонската државотворност и национална свест, нагласувајќи дека тој бескомпромисно се борел против османлиската тиранија, великобугарскиот врховизам и сите странски обиди за инструментализација на македонското револуционерно движење.
Според партијата, Делчев останува инспирација за сите кои се залагаат за самостојна, независна и праведна Македонија, а неговите идеали и денес се водилка во борбата за суверенитет и социјална правда.
„Додека живеат идеалите на Делчев, ќе живее и Републиката“, порачуваат од Левица.
