Професорката Јована Стефановска преку објава на социјалните мрежи жестоко ги критикува досегашните македонски влади за, како што наведува, целосен недостиг од визија во меѓународната политика и економијата, предупредувајќи дека земјата денес ја плаќа цената на долгогодишната сервилност кон Западот и на коруптивното владеење.
Таа посочува дека во последниот период сме сведоци на „огромни тектонски промени во меѓународната политика и економијата“, при што бројни земји, вклучително и членки на Европската Унија, активно се свртуваат кон нови пазари и партнери, како Јужна Америка, Индија и Кина. Во тој контекст, Стефановска нагласува дека ваквите трендови одамна биле најавувани од Левица, која, според неа, визионерски укажувала на потребата од диверзификација на надворешната политика и економската соработка на Македонија.
„Со години ги следам ставовите на Левица и можам да кажам дека многу визионерски беа најавувани овие промени. Тие укажуваа дека Македонија треба да ја напушти сервилноста кон ЕУ и САД и да отвори соработка со други пазари – нешто што денес го прават многу земји“, наведува професорката.
Според Стефановска, причината зошто овие укажувања не добиле простор во креирањето на државните политики лежи во, како што вели, криминалниот и клиентелистички карактер на досегашните владејачки елити.
„Сите влади досега беа ориентирани исклучиво кон лично богатење и криминал, неспособни за визионерски постапки“, пишува таа, додавајќи дека резултат на таквото владеење е енормната задолженост на државата и постојаното земање кредити за рефинансирање на старите долгови, без реални инвестиции во капитални проекти што би можеле да создадат нова вредност.
Во својата објава, Стефановска остро го критикува и општествениот амбиент, оценувајќи дека граѓаните се или изманипулирани, или заробени во клиентелистички односи, што доведува до отсуство на масовен отпор и протести против, како што вели, „огромните општествени девијации“.
„Тоа е нашето милје – народ кој не излезе масовно да протестира ниту за една сериозна општествена неправда, иако живееме во време на целосна информираност. Во Македонија не остана ‘штоф за костум’“, заклучува Стефановска.
